"مبعرفش أقعد في البيت".. مسن 73 سنة يتقدم لوظيفة في المنوفية ليعلم الشباب معنى الكفاح
"مبعرفش أقعد في البيت".. حكاية الحاج محمد 73 سنة اللي رفض الراحة وقرر ينزل يشتغل في المنوفية
في زمن بقى فيه كتير من الشباب بيدور على الراحة، قرر الحاج محمد، ابن الـ 73 عامًا، إنه يعمل العكس تمامًا.. ينزل يدور على شغل.
ولد الحاج محمد عام 1953، وقضى عمره كله متنقلًا بين المهن، اشتغل في الزراعة والنجارة والسباكة، وغيرها من الأعمال اللي اكتسب منها خبرة السنين، لكنه رغم كل ده، عمره ما فكر يقعد في البيت.
سمع عن فرصة شغل.. فراح يقدم
وقال الحاج محمد إنه أول ما سمع عن فرص توظيف، قرر على طول يروح يقدم، لأنه ببساطة "مبيعرفش يقعد في البيت من غير شغل".
وأكد أن عنده أبناء بيشتغلوا، وهو طول عمره كان بيساعدهم وبيقف جنبهم، لكن المرة دي قرر يشتغل عشان يساعد نفسه، ويعتمد على جهده وعرقه، بدل ما يفضل قاعد في البيت مستني.
مشوار من سلامون للسادات.. ودعوة من زوجته
الحاج محمد اتحرك من قريته سلامون بحري، التابعة لمركز الشهداء بمحافظة المنوفية، لحد مدينة السادات، عشان يتقدم للوظيفة.
وقبل ما يخرج من بيته الصبح، كانت زوجته بتودعه بدعوة بسيطة خرجت من القلب:
"ربنا يوفقك ويكرمك"
حكاية الحاج محمد مش مجرد خبر عن راجل كبير بيدور على شغل، دي رسالة لكل الشباب إن الشغل مش بالسن.. الشغل بالعزيمة، وإن اللي اتعود على الكفاح عمره ما يعرفش يقعد في البيت.
.jpg)
تعليقات
إرسال تعليق